Još jedna karnavaloda je iza nos.
Zojnih godišč to je večje manje uvik isto. Bilo je o temu govora u pasonemu tekstu, a i bilo je otprilike kako smo i očekivali. Povorka je bila kako i od pasonih godišč, ovje godine su bili i karnavol i karnevalica, maškare u povorci su bile interesantne, tastamenat svaku godinu sve dužji, a svita ča ga slušo sve manje… Posli tega Ferali, pašticoda, ples…
Dakle, guromo naprid kako možemo. Glavno je da se ništo dogojo.
Nismo po televizji i u novine jer nismo posebno interesantni, a falabogu nismo ni po sudima jer nos još nikuor ni tuži.
A ni da nismo meritali! Bome da smo meritali, kako ovega godišča tako i sve ove godine pri.
Motori su vozili barzo i sa otvorenima auspucima ča je, koliko se meni čini – kršenje prometnih propisa. Bilo je i neregistrironih auti, storih karampani.
Bilo je nikoliko maski kojima se izrugivalo one na koje su se te maske odnosile.
U tastamenat su se duperali „šporke“ riči, a među publikon je bilo i dicje.
I nazojnu smo užgoli i karnavola i karnevalicu ča je ustvari bila klasična lomača (niki sada govore da je ta lomača poziv na linč!), a to sigurno ni za dičje oči i te scene mogu izazvat traume, ili nočne more kod molije dicje.
Tako smo eto dobro i pasali, puno boje nego niki drugi ča su ogrizli prijave i tužbe.
A svakje godine tega je sve večje i večje.
Pari se da niki jedva čekodu karnavol, ne da bi se smijali i veselili, nego da bidu svitu pokozali kako je karnavol (likom i pojavom) jedna velika pogarda i kako bi sve to vajalo zatrit jer da je karnavol upravo ono ča i je – izvor svakega zla.
Ali, mi to znomo i bez da non se reče.
Istina, ni uvik sve u karnavalodima lipo za vidit, a niti je ono ča se reče uhu uvik ugodno čut. Bilo je tako i ovega godišča na večje karnavalodi u Dalmacji.
Ma meni se pari da mnogi ustvari neznodu ča govoridu, a da in karnavaloda odlično duođe da bi ništo ka pametno rekli u ovo vrime po novuoj godini kad se baž i ne dogojo puno stvori. Jedna turistička sezona (i sva sranja koja su se tada dogojala) je odovna pasala, a do slijedeče sezonje (i do svih sranji koja če sa njuon duoč) još imo dosta. Znači, karnavol je odlična prilika da se pokože da i zimi mislimo, da smo budni i da smo na braniku morala.
Sada bi jo ovuode vajalo da počmen pisat ča je karnavol, kad je počje, od kojega stolječa… antika, Rim, Jupiter, srednji vik i tako daje, ali niječu puno. Svak kuo o temu hoče ništo znat može okrijenut Internet i noč sve ča ga zanimo. U puol urje, ako se hoče, sve se može doznat.
Ali vajo postavit pitanje – u čemu je bit karnavola?
Znomo svi, bit je u temu da se u to vrime može svega reč, može se svakih ludosti i monadi činit a da se nikuor nimo prava idot, jer je i temu drugemu dozvoljeno da i vuon to isto čini.
Recimo, u storemu Rimu posluga, odnosno robovi, te done su bili slobodni. Gospodori bi otvorili armarune i ovi su se mogli ubukuvot u njihovu robu, mogli su hi imitirat, mogli su in se rugat i biečit in se. Drugin ričima, mogli su hi zajebavat do mile voje, a ovi se nisu idoli, nego su se smijali. Kad bi karnavol paso sve bi se vrotilo u normalu. Gospodori su opeta bili strogi gospodori, a robovi su bili bidni robovi.
I tako je to hodilo naprid sve do današnjih don. Je, u međuvremenu su niki znali i zabronit te karnavalode, ali sve se to opeta vračolo. Minjali su se sistemi i režimi, padoli su države i vlade, ali karnavalode su ostale.
E sada je pitanje – zoč su ostale?
Jednostavno zato jer su one puku potribne kako – šuog. Nisu potribne onima koji su na vlasti jer sve ča se u karnavalodima dogojo, uglavnon je usmjereno kontra vlasti.
Da nimo vlasti i politikje, karnavola danas vjerojatno nebi niti bilo.
Oni svi skupa živu u međusobnoj koegzistenciji.
Karnavol i služi da bi se moglo reč sve ono ča bi se tilo reč, a kroz godišče se ne može reč. Baž bi se i moglo reč, ali u vrimenu karnavola to pasoje bezbolno i nikuor se na to ne ido i nesmi se idot.
Karnavol služi da bi se izrugo društveni sustav i niki judi koji su njegovi dionici. Služi i da bi se ismijali pojedini aktualni događaji koji su se dogodili, ili se o njima vode polemike i diskusije. I to je tako. To je takvo vrime i to su takvi doni.
I onda se nođu niki puno pametni koji u svemu temu nođu elemente – nasilja.
Kad se izgori karnavol onda je to poziv na linč. Kad se koga u tastamjentu „opere“ onda je to vriđonje. Kad se ubučeš u cigana, ili u pedera, onda je to udar na manjine. Kad se muški ubuče u žensku onda se dižu feminiskinje jer da je to ismijavanje i omalovažavanje „slabijeg“ spola i nezaštičenih itd.
Evo čiton, nindir gore u Belgiju u jedno misto judi su ludi za karnavolon i bili su uspili da ga ubocidu u kulturnu baštinu UNESCO-a, ča ni molo stvor. I sve je bilo lipo i dobro dok loni jedna alegorijska kola nisu bili „posvječeni“ – Židovima. I to je bilo amen.
Podhitno su hi isključili iz UNESCO-a!
U nos su se sad čapali onih sa Murtera jer su sa sobon u povorku nosili jednega kreponega divjega projca, glovu od teliča i jednu patku. Imobit da su sve to bili uzjeli u bikariju, i mjeso i ostale rekvizite, ali nimo vezje. Da se to nesmi! Da ni humano!
Loni su najebali oni radi slikovnici, ovega godišča oni u Imotski. Političari se idodu ako karnavol sliči na kojega od njih.
Ako karnavola užgu – zoč su ga užgoli, ako ga obisidu – zoč su ga obisili. Tužije svak svakoga.
I interesantno, svak se od ovih dušebrižnika kroz kritiku karnavola hoče pokozat kako veliki humanista i pokupit čaguod političkih poeni. Kritika karnavola in duođe kako investicija u budučnost.
Imo i otvorenih poziva da se ta „poganska“ tradicija ukine.
Drogi moji moralisti i humanisti…!
Hočete vi meni objasnit zoć čekote karnavola da bi se sa tima odgojnim, moralnima i humanističkima temima bavili.
Evo, dok ovo pišen, a pijetak je večer, gori mi televizija, niki je film na drugi program. Bocin oko diguod, puco se, ubije se, karv somo ča iz televizije ne šikne vonka, oružja ko u prići, svakakvje varsti… Jedino nison vidi višecjevne raketne bacače, tenkove i avione. Martvi na sve strone, ranjeni, falidu in ruke, noge, rukima daržidu čriva da in ne ispodu…
A koliko večeras dicje gledo ovi film?
Po svu večer, doboto na sve programe u guornje kantune stoji oni kružič a u njemu bruoj 12. Spiker kako papagalo ponovjo svaku malo: „Program koji slijedi nije primjeren za osobe mlađe od 12 godina“.
Hočete mi objasnit zoč ne dižete svuoj glos kontra ovega gore, kontra drogje, alkohola, pjanstva… Di ste liti kad ono po brodima sve proši od seksa na otvorenom, a judi i dica pasoju i gledodu.
Danas svako dite može puoč na Internet i gledot sve gadarije ovega svita koje postoje.
Politika, sudstvo, nepotizam, uhljebi, mito, korupcija, lupeščina… I ništa, sve je to u rijedu. Doboto se ništa ne dogojo.
Svi mučidu, a mi tonemo sve dubje i dubje.
I čekomo kad če karnavol, jer jedino je bidan karnavol i ono ča se u temu vrimenu dogojo – problem.
A vite, jo mislin da ni problem karnavol nego smo problem mi. Jer da smo mi drugačiji i karnavol bi bi drugačiji. Baž ne puno drugačiji, jer karnavolu je dužnost da bude karnavol, ali baž bi bi pinku boji, pinku uljudniji.
Čaguod smo mi gorji, gorji je i karnavol. Kojin mi putjen grijemo, grije i vuon. Mi livo, livo i vuon. Okrijenemo desno, i vuon desno.
Di mi stavimo nogu stavi je i vuon.
Karnavol je naša slika, naša sjena koja nos prati.
I naša sudbina.
